«Ne qaldy taraq-taraq,
Shashylǵan júregimnen.
Jóndeı almaspyn endi,
Synǵanyn bilemin men.
Qolymnan qulap túsip kúl boldy ózegimde,
Sertimdi senimen birge jerledim óz qolymmen».
Bul «Janyp-sóný» dep atalatyn ánniń mátini. Taǵy kerek pe? Minekıińiz...
«Kezegin kútpeı
Qar jaýady kúzde,
Qadiri bolmaı
Erip keter lezde.
Kóringen kóshedi
Tal da ósedi
Jemisin bermeı
Kóktem qaraıdy».
Bul «Asyǵady ómir» dep atalatyn kelesi bir ánniń mátini.
Qajet bolsa, bul sııaqty mysaldardy júzdep keltirýge bolady. Eń keremeti sol, osylardyń bári de búginde teledıdar arqyly jıi-jıi oryndalyp, bizdiń jelókpe aǵaıyndar dýyldata qol soǵyp, rahattana tyńdap júrgen ánsymaqtardyń sózderi. Olaı bolatyn sebebi qazir ekiniń biri aqyn, ekiniń biri kompozıtor. Sondyqtan, ózderi oryndaıtyn «ánderdiń» mátinin de, mýzykasyn da ózderi jazady. Burynǵy zamandarda mundaı sózderdi «qoıyrtpaq», al, ánderdi «ánsheıin áláýláı ǵoı» deıtin de qoıatyn. Endigi jerde ondaılar ánniń naǵyz tóresine aınaldy da, olardy oryndaýshylar «juldyz» bolyp shyǵa keldi. Oǵan bir jaǵynan sondaı konsertterdi tamashalaıtyn aǵaıyndarymyzdyń talaby men talǵamynyń tómendigi de «kómektesip» otyr.
Keshegi keńestik dáýirdegi sııaqty bireýi muǵalim, bireýi ınjener, bireýi dáriger, endi bireýleri mehanızator bolyp halyq sharýashylyǵynyń túrli salalarynda eńbek etip, ózine de, eline de paıda keltirýge tıis talaı jigitter men qyzdar saýyq-saıran quryp sahnada júr. Kópshiliktiń aıtqandaryna sensek, olardyń deni jurtshylyq aldyna nemese ekrandarǵa toı-tomalaqtardan tapqan aqshalaryn berý arqyly shyǵatyn kórinedi. Onyń ózi bizdiń birqatar qazaqstandyq telearnalar úshin ońaı olja boldy. Bir jaǵynan – tabys, ekinshi jaǵynan – efır ýaqytyn toltyrady. Ol az deseń, bir konsertti birneshe ret qaıtalaıdy. Sondyqtan shyǵar, otandyq telearnalardaǵy taýsylmaıtyn konsertterden ábden yǵyr bolǵan talǵamy joǵary, salıqaly kórermen kóbine shetelderdiń telehabarlaryn qaraıdy eken. Al, jańaǵy «juldyzdardyń» óz tyńdaýshylary, dálirek aıtqanda, óz «kontıngenti» bar.
Baıaǵy zamanda bir aqyldy qarııa balalaryn jınap alyp, «Báriń birdeı qoıshy bolsańdar qul bolarsyńdar, báriń birdeı ánshi bolsańdar qý bolarsyńdar. Bireýleriń jeńil tirlik qýyp ánshi bolsańdar da, qalǵandaryń qoıshy bolyńdar. Áıtpese, ómir súrýleriń qıyn bolady», degen eken.
Keıde sahnada ekiden-úshten qosylyp alyp sekeńdep júrgenderge qarap otyryp jastary egde tartyp, onsyz da syńsýdan árige bara almaıtyn daýys-tary múldem shyqpaı qalǵanda osynaý qyz-jigitter qaıda baryp, qalaı kún kórer eken dep oılaıtynym da ras. Aıtqandaı, buryn ándi eki adam oryndasa – eki daýyspen, úsh adam bolsa úsh daýyspen oryndaıtyn. Birneshe adamnyń qosylyp aıtýynyń máni de osyǵan kelip saıatyn. Búginde bári qosylyp bir daýyspen aıtady. Bul da biryńǵaı «jylaýyq» ánderge áýes ánshilerimizdiń jeke oryndaýǵa daýystarynyń jetpeıtinin dáleldese kerek.
Biz aıtyp otyrǵandaı «aýyldyń alty aýyzyn» aıtatyn ánshiler keńestik zamanda da az bolǵan joq. Keıbir talanttylary tipti respýblıkalyq teledıdarǵa da shyǵyp jatty. Biraq ol kezde eshkim olardan «juldyz» jasaǵan emes, ári ketse kórkemónerpazdar úıirmeleriniń músheleri dep ataıtyn. Al, qazir:
«Ne qaldy taraq-taraq,
Shashylǵan júregimnen.
Jóndeı almaspyn endi,
Synǵanyn bilemin men».
Shynymen de, myna túrimizben eshqashan jóndeı almaıtyn shyǵarmyz...
Seıfolla ShAIYNǴAZY,
«Egemen Qazaqstan»
